Chand se un ke chehre pe gesuye mushk faam do – Naat Lyrics in اردو (Urdu)

چاند سے اُن کے چہرے پہ گیسوئے مُشک فام دو

دن ہے کُھلا ہوا مگر وِقتِ سحر ہے شام دو

رُوئے صبیح اک سحر زُلف دوتا ہے شام دو

پھول سے گال صُبح دَم مہر ہیں لالہ فام دو

عارضِ نُور بار سے بکھری ہوئی ہٹی جو زُلف

ایک اندھیری رات میں نکلے مہِ تمام دو

اُن کی جبینِ نُور پر زُلفِ سیہ بکھر گئی

جمع ہیں ایک وقت میں ضِدیں صُبح و شام دو

خیر سے دُن خُدا وہ لائے دونوں حَرَم ہمیں دکھائے

زَمزَم و پیرِ فاطمہ کے پئیں چل کے جام دو

ذاتِ حَسَن حُسین ہے عینِ شبیہِ مُصطفےٰ

ذات ہے اک نبی کی ذات ہیں یہ اُسی کے نام دو

پی کے پلا کے مے کشو! ہم کو بھی کِھچی ہی دو

قطرہ دو قطرہ ہی سہی کچھ تو برائے نام دو

ہاتھ سے چار یار کے ہم کو ملیں گے چار جام

دَستِ حَسَن حُسین سے اور ملیں گے جام دو

ایک نگاہِ ناز پر سیکڑوں جامِ مے نثار

گردِشِ چشمِ مَست سے ہم نے پئے ہیں جام دو

وَسطِ مُسبّحہ پہ سر رکھے انگوٹھے کا اگر

نامِ اِلٰہ ہے لکھا ٥ اور الف ہے لام دو

ہاتھ کو کان پر رکھو پا باأدب سمیٹ لو

دال ہو ایک ح ہو ایک آخر حرف لام دو

نامِ خدا ہے ہاتھ میں، نامِ نبی ہے ذات میں

مُہرِ غلامی ہے پڑی، لکھے ہوئے ہیں نام دو

نامِ حبیب کی ادا جاگتے سوتے ہو ادا

نامِ محمّد بنے جسم کو یہ نظام دو

نامِ خُدا مُرقّع، نامِ خُدا رُخِ حبیب

بینی الف ہے ہ و بَینِ زُلفِ دوتا ہے لام دو

وَحشی ہے ایک دل میرا زُلفِ سیاہ فام کا

بندِشِ عشقِ سخت تر ہے ایک دام دو

تَلوں سے اُن کے چار چند لگ گئے مہر و ماہ کو

ہیں یہ اُنہیں کی تابشیں، ہیں یہ اُنہیں کے نام دو

گاہ وہ آفتاب ہیں گاہ وہ ماہتاب ہیں

جمع ہیں اُن کے گالوں میں مہر و مہِ تمام دو

بازیِ زیست مات ہے موت کو بھی مَمات ہے

موت کو بھی ہے ایک دن موت پہ اِذنِ عام دو

اب تو مدینے لے بلا گنبدِ سبز دے دکھا

حامد و مُصطفےٰ ترے ہند میں ہیں غلام دو