Ba-khat-e-Noor us dar par likha hai Yeh baab-e-rehmat-e-Rabb-e-Ula hai Sar-e-kheera jo ab dar par jhuka hai Ada hai umr bhar ki jo qaza hai Muqabil dar ke yun Kaaba bana hai Yeh qibla hai toh yeh qibla-numa hai Dar-e-wala pe ek mela laga hai Ajab us dar ke tukron mein maza hai Yahan se kab koi khali phira hai Sakhi data ki yeh daulat-sara hai Gada toh hai gada jo badshah hai Use bhi toh usi dar se mila hai Jise jo kuch mila jis se mila hai Haqeeqat mein woh us dar ki ata hai Isi Sarkar ka mangta hai aalam Gada us dar ka har Shah-o-Gada hai Yahan se bheek paate hain salateen Isi dar se unhein tukda mila hai Isi dar se pale ga pal raha hai Isi ghar se zamana pal chuka hai Shab-e-Meraj se zahir hua hai Rusul hain muqtadi toh muqtada hai Khudai ko Khuda ne jo diya hai Isi ghar se isi dar se mila hai Khudaye pak toh ghar dar se hai pak Magar ye dar ye pak-e-Khuda hai Yahan woh ba-Khuda hai jalwa farma Jo kashti ka jahan ki nakhuda hai Shah-e-Arsh astan Allah Allah Tasawwur se Khuda yaad aa raha hai Ye woh Mehboob-e-Haq hai jis ki ru'yat Yaqeen mano ke deedar-e-Khuda hai Yadullah jis ka dast-e-pak thehra Woh bai'at jis ki bai'at ba-Khuda hai Rami jis ki rami thehri Khuda ki Kitab-e-Allah mein Allah rami hai Qasam Quran mein jis ki rah-guzar ki Khuda ne yaad ki kya martaba hai Wohi matloob jis ka har har andaz Wohi mehboob jis ki har ada hai Hawa se pak jis ki zaat-e-qudsi Woh jis ki baat bhi wahy-e-Khuda hai Nahin kehte hawa-e-nafs se kuch Jo farmayen wohi wahy-e-Khuda hai Chamak se jin ki roshan hain do aalam Mehak se jis ki har bustan basa hai Woh jalwa jis se Haq hai aashkara Woh surat jo jamal-e-Haq numa hai Woh yakta aayina zaat-e-Ahad ka Woh mir'at-e-sifat-e-Kibriya hai Woh pyara jis pe Rab hai aisa pyara Ke us ke pyare par pyara Khuda hai Woh jis ka shehar bhi hai aisa pyara Jahan ki raat din se bhi sawa hai Jahan hai be-thikano ka thikana Jahan Shah-o-Gada sab ka thiya hai Dawa dukh dard ki hai khaak jis ki Ma'asi ka jahan dar-ul-shifa hai Karam farmayiye aye sarwar-e-deen Jahan mangton ki paiham yeh sada hai Khazanay apne de ke tum ko haq ne Na qasim hi ke maalik kar diya hai Jisay jo chaho jitna chaho do tum Tumhein mukhtar-e-kul farma diya hai Do aalam bheek lete hain yahan se Jo jis ke paas hai tera diya hai Na mangain tum se hum to kis se mangain Hein sab dar band bas yeh dar khula hai Main dar dar kyun phirun dur dur sunun kyun Meray sarwar mera kya sar phira hai Ata farmate ho be-mangay sab kuch Yeh mangta tum se tum ko mangta hai Tumhara milna milna hai Khuda ka Khuda mil jaye to phir kya raha hai Ata farmayiye apne karam se Meray Maula jo dil ka mud'a hai Yehi sarkare faize aasar hai woh Jahan se faiz ka dariya baha hai Yehi se paate hain sab apne matlab Har ik ke waaste yeh dar khula hai Ba har lahza ba har sa'at ba har dam Dare sarkar faize aasar wa hai Nahin taqseem mein tafreeq kuch bhi Ke dushman bhi yahin ka keh raha hai Yeh woh dar hai woh bhi hazir hai Jo us sarkare ka dushman chupa hai Salam-e-rustai be-gharaz neest Woh kya ta'azeem ko hazir hua hai Aqeeday mein to us ke shirk hai yeh Dikhaane ko taqiyya kar liya hai Jala imaan se hoti hai dil par Woh andha sheesha hai jo be-jala hai Nahin sheesha nahin woh dil to jis par Khuda ne khatm farma di tawa hai Na thehray mutahar-e-haq ki boond jis par Luhabi kya hai ik chikna ghara hai Bohat bad firqay paida ho chukay hain Sabhi ne ik naya mazhab garha hai Jo mazhab-e-Ahle Sunnat ke ilawa Bana hai woh jahannam ka garha hai Jamaat par yad-e-rehmat hai haq ka Juda firqa jahannam mein gira hai Hai in mein ek firqa sab se badtar Jise shirk az umoor-e-aamma hai Nahi jis se koi majood khali Koi bhi us ki zad se bach saka hai Har ek us shirk se thehra jo mushrik Jo hai ya hoga ya aage hua hai Sahaba khud Nabi balkay khud Allah Sabhi par hukm-e-shirk us ne jara hai Jise bidat ki lat itni pari hai Ke sunnat ko bhi bidat bolta hai Maye bidat se hai sarshar aisa Ke sab kuch us ko bidat soojhta hai Thi itni tund maye jis ke nashay mein Ke khud apne hi ko bhoola hua hai Yeh khud hai bidati mushrik yaqeena Magar Sunni ko bid'i jaanta hai Hain us ke shirk-o-bidat ahle gehlay Sarapa jin mein khud dooba hua hai Yeh aisa us ka hukm-e-shirk-o-bidat Usay sawan ke andhay ka hara hai Hai Sunni aaina us ne jo dekha Nazar apna hi chehra aa gaya hai Usay Man Ibtada'a toh reh gaya yaad Magar Man Sanna yeh bhoola hua hai Khud apne fatwon se hai aap mushrik Na bas mushrik hi yeh mushrik jana hai Nahi hai baap hi mushrik ke jad bhi Aur us ka jad jahan tak silsila hai Khuli tunqisein mehbooban-e-haq ki Yeh firqa bar-mula karta raha hai Khuli toheen ki hai khud Khuda ki Ke us ko kizb par qadir kaha hai Na mumkin hi kaha balkay yahan tak Barha hai yeh ke waqay keh gaya hai Na bas ik kizb par hi us ne bas ki Ke jahl-o-zulm-o-sarqa bhi kaha hai Tumhein Haq ne diye hain woh fazail Ke shirkat in mein hona na-rawa hai Mumasil ho nahin sakta tumhara Tumhein woh fazl-e-kul rab ne diya hai Tumhari be-misali is se zahir Ke mehboob-e-khuda tum ko kiya hai Muhib kiya chahta hai misl-e-mehboob Muhib to be-misali chahta hai Magar yeh farq-e-mehboob-e-khuda ke Karoron misl mumkin manta hai Na mumkin hi ke chhoo misl waqay Kaha karta kutub mein chhapta hai Yunhi khatm-e-nubuwwat ka hai mani Shafa'at se bhi munkir ho gaya hai Musalmanon ke dar se lafz maane Magar ma'ane ka mani barmala hai Jo ma'ane un ke hain masoor ab tak Sarihat se unhein rad kar raha hai Kahan tak zulm mein is ke gina'oon Kahan tak mein ganoon kiya kiya baka hai Nafi jis ilm ki sarkar se ki Usi ko nass se shetan kar diya hai Muheet-e-arz ka shetan ko jab Yeh nass se ilm sabit manta hai Shareek-e-iblees ko karta hai haq ka Ke shetan hi ko yeh haq janta hai Woh kuch maane bahar surat woh khud hi Bada mushrik behukum-e-khud bana hai Majaneen-o-sabee haiwan baha'im Yeh un sab ke liye bhi manta hai Nabi ghair-e-nabi mein farq poocha Batao un mein un mein farq kiya hai Unhein jaisa bataya ilm-e-aqdas Kaha hai ba'az mein takhsees kiya hai Nafi-e-sheh se ba-wajah-e-shirk ki bhi Magar phir bhi isi mein mubtala hai Jo qismat mein likha tha kyon na hota Kahein taqdeer ka likha mita hai Karein lakhon jatan hota hai woh hi Wohi hoga jo qismat mein bada hai Khayal-e-khar mein istighraq se bad Jo ta'zeem-e-nabi ko janta hai Agar is ko koi itna kahega Ke woh insaan nahin khasa gadha hai Bikhar jayenge us par kaisa kaisa Jinhein tehzeeb-e-nau ka idda hai Bayan-e-aib-e-dushman naat hi hai Ke quran mein bhi toh tabbatyada hai Ziya-e-kaaba se roshan hain aankhein Munawwar qalb kaisa ho gaya hai Hamari haziri noorun ala noor Ke baad-e-hajj hamein hazir kiya hai Ziya-e-rauza ka aalam kahun kya Ke woh toh noor-e-kaaba se siwa hai Yahan mehboob-e-rab hai jalwa aara Wahan bas ek tajalli ki ziya hai Hai yeh toh wasl se sarsabz dil shad Woh naar-e-hijr se dil sokhta hai Mah-o-khor bheek paate hain yahan se Ziya-e-rauza ka kehna hi kya hai Fiza-e-taiba ke qurbaan jaun Naseem-e-khuld si jis ki hawa hai Khafeef-o-khush maza be-misl paani Kahin duniya mein aisa kab piya hai Zameen-e-paak woh jis ko khuda ne Kitab-e-allah mein arzullah kaha hai Hamein toh taiba hai jannat se badh kar Jahan mehboob-e-haq jalwa numa hai Qadam hum jaison ke is sarzameen par Karam sarkar ka hai aur kya hai Watan ki har suhani subah noori Yahan ki shaam-e-ghurbat par fida hai