Allah! Mujhe Aalima-e-Deen bana de (Dawat-e-Islami ke kayi Madrasa-tul-Madina (lil-banat) aur Jamia-tul-Madina (lil-banat) hain, khusoosan un ki talibat aur umooman tamam deeni talibat ke liye nazm) Allah! Mujhe Aalima-e-Deen bana de Quran ke ahkaam pe bhi mujhko chala de Ho jaya kare kaash! mujhe jald sabaq yaad Maula tu mera hafiza mazboot bana de Susti ho meri door main uth jaon sawere Tu dil mera taleem mein Allah! laga de Ho Jamia ka mujh se na nuqsaan kabhi bhi Allah! yahan ke mujhe aadaab sikha de Wazeh rahe ke sabqa safhaat mein yeh kalam kuch taghayyur ke saath muzakkar ke saath kaha gaya hai umeed hai ke zaroori tafreeq ke saath dono kalam alag alag honay mein qareen ko sahoolat rahe gi. Hifz karne wali talibat yeh misra bhi parh sakti hain: ”Allah! mujhe Hafiz-e-Quran bana de“ Chutti na karoon bhool ke bhi parhnay ki kabhi bhi Maula mujhe auqaat ki paband bana de Ustaani hoon maujood ya bahar kahin masroof aadat tu meri shor machanay ki mita de Khaslat ho meri door shararat ki Ilahi! Sanjeeda bana de mujhe sanjeeda bana de Ustaani ki karti rahoon har dam mein ita'at Ma baap ki izzat ki bhi taufeeq Khuda de Kapray mein rakhun saaf tu dil ko meray kar saaf Allah! Madina meray seenay ko bana de Filmon se dramon se ata kar de tu nafrat Bas shauq mujhe naat-o-tilawat ka Khuda de Auqaat ke andar hi parhoon saari namazein Allah! ibadat mein meray dil ko laga de Parhti rahoon kasrat se Durood un pe sada mein Aur zikr ka bhi shauq paye Ghous-o-Raza de Sunnat ke mutabiq mein har ik kaam karoon kaash Tu paikar-e-sunnat mujhe Allah! bana de Mein jhoot na boloon kabhi gaali na nikaloon! Allah! marz se tu gunahon ke shifa de Mein faltu baton se rahoon door hamesha Chup rehne ka Allah! saleeqa tu sikha de Akhlaq hoon achay mera kirdaar ho suthra Mehboob ka sadqa tu mujhe naik bana de Ustaani hoon maa baap hoon Attar bhi ho saath Yun hajj ko chalein aur Madina bhi dikha de